Primeiru Ministru, Kay Rala Xanana Gusmão, Ensera Ofisialmente Formasaun Lian Jestual

DILI, 20 Fevereiru 2026
Primeiru-Ministru (PM), Kay Rala Xanana Gusmão ensera Workshop Nasionál Kona-bá Validasaun Sinál Jestuál Timor-Leste ho tema: “𝐑𝐨𝐧𝐚 𝐡𝐨 𝐚𝐦𝐢-𝐧𝐢𝐚 𝐦𝐚𝐭𝐚𝐧 𝐧𝐨 𝐤𝐨’𝐚𝐥𝐢𝐚 𝐡𝐨 𝐚𝐦𝐢-𝐧𝐢𝐚 𝐥𝐢𝐦𝐚𝐧” ne’ebé realiza iha salaun João Paulo II Comoro, sesta (20/02/2026).

Workshop ne’e realiza durante loron lima hahú hosi 16-20 Fevereiru ho partisipante kada munisípiu iha na’in-lima, hetan apoiu hosi Departamentu Negósiu Estranjeiru no Komérsiu (DFAT) Austrália, koordena ho Ministériu Edukasaun, Institutu Nasionál Linguistika (INL) no Assosiasaun Defisiénsia Timor-Leste (ADTL).

Formasaun ne’e fasilita labarik sira atu aprende lian jestuál hosi idade kiik, fasilita komunikasaun entre defisiénsia tilun no ema ne’ebé la ho defisiénsia tilun iha família, fatin- servisu no fatin públiku sira.

Durante tinan tolu ikus, Klibur Defisi’ensia Tilun Timor-Leste (KDT-TL) parseria ho Assosiasaun Defisiénsia Timor-Leste (ADTL) Ministériu Edukasaun (ME) no Institutu Nasionál Linguistika (INL) servisu hamutuk ho komunidade defisiénsia tilun iha Timor-Leste ho apoiu tékniku hosi PHD hamutuk lori ida-idak nia koñesimentu, kultura no esperiénsia moris hodi dezenvolve matadalan lian jestuál Timor-Leste nian – Lian ida-ne’ebé lori dignidade, kreatividade no identidade bá sidadaun sira ho defisiénsia tilun.